- Details
- Hits: 62
ఆస్ట్రేలియా మాజీ క్రికెటర్ బ్రెట్ లీ ముంబైలో సందడి చేశారు. క్యాన్సర్ వ్యాధితో బాధపడుతున్న చిన్నారుల కోసం నిర్వహించిన ప్రత్యేక కార్యక్రమంలో బ్రెట్ లీ సరదాగా గడుపుతూ చిన్నారుల్లో ఆనందాన్ని నింపే ప్రయత్నం చేశారు. మ్యూజిక్ థెరపీ పేరుతో జరిగిన ఈ కార్యక్రమంలో ఆయన ప్రత్యేక ఆకర్షణగా నిలిచారు. తన సొంత స్వచ్ఛంద సంస్థ మ్యూజిక్ ఇండియా ఫౌండేషన్ ద్వారా తరచూ బ్రెట్ లీ ప్రత్యేక కార్యక్రమాలు చారీటీకోసం నిర్వహిస్తూ ఉంటారు.
- Details
- Hits: 124
కొన్నాళ్ల క్రితం వరకు సాంప్రదాయ టెస్టులు మినహా వన్డేల్లో ఈ టీమ్‌ అసలు ఏ మాత్రం ప్రభావం చూపించలేకపోయింది. అయితే గత రెండేళ్లలో ఒక్కసారిగా సీన్‌ మారిపోయింది. స్పెషలిస్ట్‌ ఆటగాళ్లతో ప్రపంచంలో ఏ వేదికలోనైనా వన్డేల్లో భారీ స్కోర్లు సాధిస్తున్న ఇంగ్లండ్‌ బలమైన జట్టుగా ఎదిగింది. తమ వన్డే చరిత్రలో అత్యుత్తమ దశలో ఉన్న ఇంగ్లండ్‌ సొంతగడ్డపై చాంపియన్స్ ట్రోఫీలో ఫేవరెట్‌ అనడంలో ఎలాంటి సందేహం లేదు. గతంలో ఇంగ్లండ్‌లోనే జరిగిన రెండు చాంపియన్స్ ట్రోఫీల్లోనూ ఫైనల్లో ఓడిన ఆ జట్టు ఈసారి మాత్రం చరిత్ర తిరగరాయాలని పట్టుదలగా ఉంది.
ఇయాన్‌ మోర్గాన్ నాయకత్వంలోని ఇంగ్లండ్‌ జట్టు తాజా ఫామ్ ఏ ప్రత్యర్థికైనా దడ పుట్టించేలా ఉంది. దక్షిణాఫ్రికాలాంటి బలమైన ప్రత్యర్థితో జరిగిన తొలి వన్డేలో ఆ జట్టు సాధించిన అలవోక విజయం దానిని మళ్లీ నిరూపించింది. ఆల్‌రౌండ్‌ నైపుణ్యం గల ఆటగాళ్లతో పాటు సొంతగడ్డపై చాంపియన్స్ ట్రోఫీ జరుగుతుండటం ఆ జట్టుకు అదనంగా అనుకూలించే అంశం. ముఖ్యంగా మోర్గాన్ కెప్టెన్‌గా ఎంపికయ్యాక వన్డే టీమ్‌లో ఒక్కసారిగా మార్పు వచ్చేసింది. ఏకంగా తొమ్మిదో స్థానం వరకు ఎలాంటి తత్తరపాటు లేకుండా ఆత్మవిశ్వాసంతో బ్యాటింగ్ చేయగల లైనప్‌ ఇంగ్లండ్‌ సొంతం. తమకు అనుకూలించే వాతావరణ పరిస్థితుల్లో స్వింగ్‌తో చెలరేగిపోగల బౌలర్లు కూడా ఆ జట్టులో ఉన్నారు. ఇవన్నీ ఇతర జట్లకంటే ఆతిథ్య జట్టును అందరికంటే ముందు నిలబెడుతున్నాయి.
చాంపియన్స్ ట్రోఫీలో ఇంగ్లండ్‌ రెండు సార్లు ఫైనల్ చేరింది. 2004లో వెస్టిండీస్ చేతిలో ఆ జట్టుకు అనూహ్య పరాజయం ఎదురైంది. 217 పరుగులు చేసిన ఇంగ్లండ్‌.. విండీస్‌ను 147/8 వద్ద కట్టడి చేసి విజయాన్ని ఆశించింది. కానీ విండీస్‌ బ్యాట్స్‌మెన్‌ బ్రౌన్, బ్రాడ్‌షా 71 పరుగులు జోడించి ఇంగ్లండ్‌ కథ ముగించారు. గత టోర్నీలో భారత్‌ చేతిలోనే ఇంగ్లండ్‌కు ఓటమి ఎదురైంది. ఈ 20 ఓవర్ల మ్యాచ్‌లో కూడా ఆ జట్టు విజయానికి చేరువగా వచ్చింది. చేతిలో ఆరు వికెట్లతో 16 బంతుల్లో 20 పరుగులు చేయాల్సిన స్థితి నుంచి ఇంగ్లండ్‌ ఓటమి దిశగా నడిచింది. ఓవరాల్‌గా చాంపియన్స్ ట్రోఫీలో 21 మ్యాచ్‌లు ఆడిన ఇంగ్లండ్‌ టీమ్‌ 11 గెలిచి, 10 మ్యాచ్‌లలో ఓడింది.
ఓపెనర్లు జేసన్‌ రాయ్, హేల్స్‌ జోడి ప్రత్యర్థి ఎవరైనా పరుగుల వరద పారిస్తోంది. ప్రతీసారి వీరు అందిస్తున్న శుభారంభమే ఇంగ్లండ్‌ భారీ స్కోరుకు బాటలు వేస్తోంది. నిలకడకు మారు పేరైన జో రూట్‌తో పాటు కెప్టెన్ ఇయాన్‌ మోర్గాన్, బెన్‌ స్టోక్స్‌లతో జట్టు మిడిలార్డర్‌ కూడా పటిష్టంగా ఉంది. ముఖ్యంగా స్టోక్స్ ఆల్‌రౌండ్‌ నైపుణ్యం ఇంగ్లండ్‌ జట్టుకు వరంలా మారింది. ప్రపంచంలోనే ఇప్పుడు మేటి ఆల్‌రౌండర్‌గా ఉన్న స్టోక్స్, ఇటీవల ఐపీఎల్లో ప్రదర్శించిన ఫామ్‌ను కొనసాగిస్తే ఇతర జట్లకు కష్టాలు తప్పవు. మోకాలి గాయం నుంచి కోలుకొని అతను పూర్తి ఫిట్‌గా మారడం ఆ జట్టు ఆందోళనను దూరం చేసింది. మొయిన్‌ అలీ కూడా ఆల్‌రౌండర్‌గా చెలరేగిపోతున్నాడు. ఇంగ్లండ్‌ పిచ్‌లపై వోక్స్, వుడ్, ప్లంకెట్‌లాంటి పేసర్లు సరిగ్గా సరిపోతారు.
లీగ్‌ దశలో జూన్‌ 1న జరిగే టోర్నీ ప్రారంభ మ్యాచ్‌లో బంగ్లాదేశ్‌తో ఇంగ్లండ్‌ తలపడుతుంది. ఈ మ్యాచ్‌తో పాటు న్యూజిలాండ్‌తో జరిగే తర్వాతి మ్యాచ్‌లో కూడా ఇంగ్లండ్‌కు మంచి విజయావకాశాలు ఉన్నాయి. చివరి మ్యాచ్‌లో ఆసీస్‌తో తలపడాల్సి ఉన్నా ఇంగ్లండ్‌ గడ్డపై ఇటీవల ఆస్ట్రేలియాకు రికార్డు అంత గొప్పగా ఏమీ లేదు కాబట్టి మోర్గాన్ సేన సెమీస్‌ అడుగు ఖాయంగా వేసినట్లే. ఇంగ్లండును సొంతగడ్డపై ఎదుర్కోవడం కష్టమే అని భారత కెప్టెన్ విరాట్ కోహ్లీ వ్యాఖ్యానించాడు. మరోవైపు ఈ సారి ఛాంపియన్స్ ట్రోఫీ గెలిచే సత్తా ఇంగ్లండుకే ఉందని వెస్టిండీస్ లెజెండ్రీ క్రికెటర్ బ్రియాన్ లారా విశ్లేషించాడు.
- Details
- Hits: 97
ధోనీ కంటే నేనేం తక్కువ ధోనీ కంటే నేనే సీనియర్ ను ఐపీఎల్లో ఆడని అశ్విన్ కు చోటా ఐపీఎల్లో రాణించిన గంభీర్ ను మాత్రం పట్టించుకోరా వరుస ప్రశ్నలతో టర్భోనేటర్ హర్భజన్ సింగ్ బీసీసీఐ సెలక్షన్ కమిటి మీద ఫైర్ అయ్యాడు. ఛాంపియన్స్ ట్రోఫీ జట్టులో తనను పరిగణలోకి తీసుకోనందుకు ఆగ్రహం వ్యక్తం చేశాడు. జట్టుకు ఎంపికైన ధోని కంటే తానేం తక్కువా జట్టులో ఎంపికలో ధోనీకి విశేష ప్రాధాన్యమిస్తున్న సెలక్టర్లు తనను మాత్రం విస్మరిస్తున్నారని వాపోయాడు.
చాంపియన్స్ ట్రోఫీలో పాల్గొనే భారత జట్టులో చోటు దక్కకపోవడంపై వెటరన్ ఆఫ్ స్పిన్నర్ హర్భజన్ సింగ్ ఆవేదన వ్యక్తం చేశాడు. తనకు టీమిండియా జట్టులో స్థానం దక్కుతుందని తొలుత ఆశించినట్లు చెప్పిన భజ్జీ...టీమిండియా మాజీ సారథి మహేంద్ర సింగ్ ధోనికి స్థానం కల్పించడాన్ని పరోక్షంగా తప్పుబట్టాడు. చాంపియన్స్ ట్రోఫీలో ధోనికి స్థానం కల్పించి తనకు ఎందుకు చోటు కల్పించలేదో అర్ధం కాలేదన్నాడు. దాదాపు ఎప్పుడ్నుంచో క్రికెట్ ఆడుతున్న తనకు కనీసం ధోనికి ఇచ్చిన ప్రాధాన్యతను ఇచ్చి ఉంటే సంతోషించే వాడినని ఎట్టకేలకు మనసులోని బాధను వెల్లడించాడు. ఇక్కడ ధోని కథ వేరు తన కథ వేరుగా అభివర్ణించిన భజ్జీ.. చాంపియన్స్ ట్రోఫీలో పాల్గొనే భారత జట్టు సెలక్షన్ నిజాయితీగా జరిగిందని తాను అనుకోవడం లేదన్నాడు.
ధోని బ్యాటింగ్ లో కీలకం. అందులో ఎటువంటి సందేహం లేదు. ధోని ఫామ్ లో ఉన్నా, లేకపోయినా జట్టులో ఎంపిక చేయడానికి కారణం అతని అనుభవం. గత కొంతకాలంగా ధోని పెద్దగా బంతిని హిట్ చేయడం లేదు. అది మనం చూస్తునే ఉన్నాం. అయితే అతను మాజీ సారథి కావడంతో పాటు పరిస్థితుల్ని అర్ధం చేసుకుని జట్టును ముందుకు తీసుకెళ్లే సామర్థ్యం ఉన్నవాడు. ప్రధానంగా మిడిల్ ఆర్డర్ లో యువ క్రికెటర్లకు ధోని అనుభవం ఉపయోగపడుతుందనడంలో సందేహం లేదు.
ఇక నా వరకూ వస్తే ధోనికిచ్చిన ప్రాముఖ్యత నాకివ్వలేనందుకు బాధగా ఉంది. మేము కూడా 19 ఏళ్ల నుంచి క్రికెట్ ఆడుతున్నాం. టీమిండియా గెలుపుల్లో, ఓటముల్లో భాగస్వామ్యులమవుతునే వస్తున్నాం'అని గౌతం గంభీర్ ను ఎంపిక చేయకపోవడాన్ని కూడా హర్భజన్ సింగ్ ఇక్కడ ప్రస్తావించాడు. 'నేను రెండు వరల్డ్ కప్ లకు ప్రాతినిథ్యం వహించా. అవేవి పట్టించుకోలేదు. కొంతమందికి మాత్రమే ఈ తరహా ప్రాముఖ్యత ఇస్తున్నారు. ఇలా ప్రాముఖ్యత దక్కని ఆటగాళ్లలో నేను కూడా ఒకడ్ని'అని భజ్జీ తన స్వరాన్ని పెంచుతూ సెలక్షన్ కమిటీ తీరును తప్పుబట్టాడు. కచ్చితంగా సెలక్షన్ అనేది నిజాయితీగా జరగలేదని తాను అనుకుంటున్నట్లు భజ్జీ తెలిపాడు.
ఇప్పటికీ తాము ఐపీఎల్ వంటి టోర్నీలు ఆడటానికి కారణం టీమిండియా జట్టులో చోటును ఆశించి మాత్రమేనని అన్నాడు. ఐపీఎల్లో గౌతం గంభీర్ నిలకడగా రాణించినా అతన్ని ఎందుకు పక్కన పెటారని భజ్జీ నిలదీశాడు.. మరొకవైపు ఐపీఎల్ -10 సీజన్ లో అస్సలు పాల్గొనని రవి చంద్రన్ అశ్విన్ ను చాంపియన్స్ ట్రోఫీలో ఎంపిక చేయడానికి కారణం ఏమిటని ప్రశ్నించాడు. వేర్వేరు ప్రజలకు వేర్వేరు నిబంధనలు ఏమిటో తనకు అర్థం కావడం లేదని తన అసహనాన్ని వ్యక్తం చేశాడు హర్భజన్.
- Details
- Hits: 73
బీసీసీఐ మళ్లీ కోచ్ వేటలో పడింది. ఛాంపియన్స్ ట్రోఫీతో ప్రధాన కోచ్‌గా అనిల్‌ కుంబ్లే ఏడాది పదవీ కాలం ముగియనుండటంతో అతడి స్థానాన్ని భర్తీ చేసేందుకు బోర్డు దరఖాస్తులు ఆహ్వానించింది. విజయవంతమైన కోచ్ కుంబ్లేను కొనసాగించకుండా బోర్డు మళ్లీ ఎంపిక ప్రక్రియ చేపట్టాలనుకుంటోంది. ఆటగాళ్ల జీతాలతో పాటు చాలా అంశాల్లో కుంబ్లే వ్యవహారశైలిపై గుర్రుగా ఉన్న బోర్డు అధికారులు కావాలనే ఇలా చేశారని విశ్లేషకులు భావిస్తున్నారు.
కోచ్‌గా వ్యవహరించిన కాలంలో స్వదేశంలో భారత్‌ ఆడిన 13 టెస్టుల్లో 10 విజయాలు, ఒకటే పరాజయం. వెస్టిండీస్‌తో టెస్టు సిరీస్‌ విజయంతో పాటు వన్డేల్లో కూడా మెరుగైన ప్రదర్శన. అయితే ఇవేవీ కూడా అనిల్‌ కుంబ్లేను కోచ్‌గా కొనసాగించేందుకు సరిపోలేదు. చాంపియన్స్ ట్రోఫీతో కుంబ్లే ఏడాది పదవీ కాలం ముగుస్తుండటంతో కొత్త కోచ్ ఎంపిక కోసం బీసీసీఐ మళ్లీ దరఖాస్తులను ఆహ్వానించింది. అర్హత ఉన్నవారు ఎవరైనా ఇప్పుడు దరఖాస్తు చేసుకోవచ్చు. ప్రస్తుత కోచ్ హోదాలో మళ్లీ తన బయోడేటాను పంపించాల్సిన అవసరం లేకుండా నేరుగా ఇంటర్వూ్యకు హాజరయ్యే వెసులుబాటు మాత్రం కుంబ్లేకు బోర్డు కల్పించింది.
ఆసక్తి కలిగిన వారు ఈనెల 31లోగా అప్లై చేసుకోవాల్సిఉండగా, వీరిని క్రికెట్ సలహా కమిటీ సభ్యులైన సచిన్ టెండూల్కర్, సౌరవ్‌ గంగూలీ, వీవీఎస్‌ లక్ష్మణ్‌ ఇంటర్వూ్య చేస్తారు. ‘ఈ ఎంపిక వ్యవహారం పూర్తి పారదర్శకంగా ఉండేందుకు పరిపాలక కమిటీ (సీఓఏ)కి చెందిన నామినీ పర్యవేక్షకులుగా ఉంటారు. కుంబ్లే పనితీరు బాగానే ఉంది. అయితే వచ్చే నెల 20న ఆయనతో ఒప్పంద గడువు ముగుస్తుంది. ఆ తర్వాత సహజంగా జరగాల్సిన ప్రక్రియే ఇదంతా. కుంబ్లే కూడా మరోసారి ఈ పదవి కోసం దరఖాస్తు చేసుకోవచ్చు. బీసీసీఐలోని ఏ ఒక్కరి నిర్ణయం వల్లో కోచ్ ఎంపిక జరగదు. గంగూలీ, సచిన్, లక్ష్మణ్‌ ఎంపిక చేస్తారు’ అని బోర్డు సంయుక్త కార్యదర్శి అమితాబ్‌ చౌదరి తెలిపారు.
నిజానికి మైదానంలో జట్టు ప్రదర్శన బాగున్నా ఇతర కారణాలు కుంబ్లేను ఆటోమెటిక్‌గా కొనసాగించేందుకు అడ్డు పడుతున్నాయి. కుంబ్లే వ్యవహార శైలిపై బీసీసీఐ అసంతృప్తి వ్యక్తం చేస్తోంది. సెంట్రల్ కాంట్రాక్ట్‌ ఆటగాళ్ల వేతనాలతో పాటు తన వేతనాన్ని కూడా భారీగా పెంచాలనే విషయంలో ఈ దిగ్గజ స్పిన్నర్ దూకుడుగా వెళ్లడం బోర్డుకు రుచించలేదు. ఈ కారణంగానే చాంపియన్స్ ట్రోఫీ కోసం భారత జట్టు అటు ఇంగ్లండ్‌లో అడుగుపెట్టగానే ఇటు కొత్త కోచ్ కోసం దరఖాస్తుల ఆహ్వానం కోరుతోంది. ప్రస్తుతం ‘ఎ’ గ్రేడ్‌ ఆటగాళ్లకు ఏడాదికి రూ.2 కోట్లు ఇస్తుండగా దీన్ని రూ.5 కోట్లకు పెంచాలని అలాగే కోచ్ వేతనం రూ.6 కోట్ల నుంచి రూ.8 కోట్లకు పెంచాలని కుంబ్లే సూచించారు.
కుంబ్లే ఆటగాళ్ల కోసమే కాకుండా తన కోసం కూడా బేరమాడుతున్నాడు. ఆయన చేస్తున్న డిమాండ్లు చాలా క్లిష్టంగా ఉన్నాయి. విరాట్ కోహ్లి కోసం 25 శాతం అదనంగా ‘కెప్టెన్సీ ఫీజు’ ఇవ్వాలని కూడా పట్టుబడుతున్నాడు. అంతేకాకుండా సెలక్షన్ కమిటీలో కెప్టెన్, కోచ్‌లకు కూడా సమానస్థాయిలో హోదా, ఓటింగ్‌ హక్కు కావాలంటున్నాడు. ఇవన్నీ ఆయనకు సంబంధం లేని విషయాలు’ అని బోర్డుకు చెందిన అధికారి ఒకరు వ్యాఖ్యానించారు. అలాగే కుంబ్లే సూచనల్లో చాలా వాటిని అమలు చేసేందుకు బోర్డు ఇష్టపడడం లేదు. బీసీసీఐ ఆదాయంనుంచి ఆటగాళ్లకు ఇస్తున్న 26 శాతం మొత్తాన్ని కూడా ఎట్టి పరిస్థితుల్లోనూ పెంచేది లేదని బోర్డు ఇప్పటికే స్పష్టం చేసింది.
